Oral shaharyndaǵy múmkindigi shekteýli balalarǵa arnalǵan "Shapaǵat" arnaýly áleýmettik qyzmet ortalyǵy 2009 jyly ashyldy. Bir qaraǵanda birtoǵa, birqalypty kórinetin mekemeniń de ózine tán tynys-tirshiligi bar. Mekemeniń arnaıy kólikteri tańǵy saǵat segizden bastap múmkindigi shekteýli balǵyndardy alyp keledi eken. Osy sátten bastap ortalyqtaǵy "Tańsholpan", "Aınalaıyn", "Erketaı" toptarynda jumys qyza bastaıdy. Eń aldymen, bóbekter tańǵy asyn ishedi. Sodan soń, olardyń kóńilin kóterý úshin mamandarmen birge jeńil jattyǵýlar jasalady. Mekemedegi arnaıy mamandar ár balamen keste boıynsha jumystanady. Aýa raıy jaqsy kezderi taza aýada serýendep, túrli oıyndar uıymdastyrýda. Mekeme aýlasynda da bar jaǵdaı jasalǵan. Túski as kezi de qarbalasqa toly. Bóbekter tamaqtanǵan soń jýynyp, túski uıqyǵa jatady. Alǵashynda tamaq ishýdi, durys otyryp, turýdy bilmeıtin balalar ózi sıaqty balalarǵa qarap, boı túzeı bastaıdy. Tústen keıin jospar boıynsha tárbıeshiler tárbıe saǵatyn ótkizedi eken. Keshki saǵat altyda balalardy mekeme avtobýsy úılerine jetkizip tastaıdy. Qyzmet alýshy búldirshinderdiń óz-ózine qyzmet etý daǵdylaryn qalyptastyryp, jeke damý deńgeıin arttyrý arqyly ata-analarynyń jumysqa ornalasýyna múmkindik týǵyzý, januıa múshelerine moraldyq-psıhologıalyq kómek kórsetý - mekemeniń basty mindeti bolyp tabylady. Bul jerde 1,5-18 jasqa deıingi psıhonevrologıalyq aýytqýlary bar jáne tirek qozǵalys apparaty buzylǵan balalar qyzmet alýda. Bul ortalyq olarǵa halyqty áleýmettik qorǵaý salasynda arnaýly áleýmettik qyzmetter kórsetý standartyna sáıkes áleýmettik-medısınalyq, áleýmettik-turmystyq, áleýmettik-psıhologıalyq, pedagogıkalyq, áleýmettik-eńbek, áleýmettik-mádenı, áleýmettik-ekonomıkalyq, áleýmettik-quqyqtyq baǵytta qyzmet kórsetýde.
Dúnıe esigin ashpaı jatyp, taǵdyr tálkegine ushyraǵan búldirshinderdiń óz ortasyna erterek beıimdelýi úshin mekemede arnaıy mamandar qyzmet atqarady. Arnaıy pedagogtar, tárbıeshiler men psıholog mamandary qyzmet alýshylarǵa pedagogıkalyq-psıhologıalyq dıagnostıkalyq zertteýler júrgizedi. Zertteý nátıjesinde balalarmen júrgiziletin korreksıalyq túzete-damytý jumystarynyń negizgi baǵyttary anyqtalyp, balalardyń óz-ózine qyzmet etýi men qımyl-qozǵalysyn damytý, sensorlyq daǵdysyn qalyptastyrý baǵytynda jumystar júrýde.
Balalar arnaýly áleýmettik qyzmet kórsetý standarty men aýyr, kúrdeli dárejedegi aqyl-oıy kemis balalarǵa arnalǵan túzete-damyta oqytý baǵdarlamasy boıynsha stasıonarlyq jaǵdaıda qyzmet alýda. Baǵdarlama balalardyń zattardy qabyldaýyn, sóıleý tilin, sensorlyq qabiletin, motorıkasyn damytý, áleýmettik-turmystyq baǵdarlaý baǵytynda qurylǵan. Osy maqsatta mekemede zamanaýı qurylǵylarymen jabdyqtalǵan emdik dene shynyqtyrý zaly, sensor, logoped, defektologtardyń kabıneti jumys jasaıdy. Mádenı, merekelik jáne sporttyq is-sharalar sport zalda, demeýshilerdiń kómegimen salynǵan mekeme aýlasyndaǵy jabyq besedkada ótedi.
Jyl sanap múmkindigi shekteýli balalarǵa degen qoǵamnyń kózqarasy ózgerip keledi. Elbasy N. Á. Nazarbaev «Qazaqstan joly - 2050: Bir maqsat, bir múdde, bir bolashaq» atty Joldaýynda «Múmkindigi shekteýli azamattarǵa qamqorlyq kórsetilýi tıis. Bul ózimizdiń jáne qoǵam aldyndaǵy bizdiń paryzymyz» dep atap kórsetken edi. Osy baǵytta mekemede túrli merekelik sharalar men túzete-damytý jumystary jıi júrgizilýde.
"Shapaǵat" ortalyǵyndaǵy múmkindigi shekteýli bóbekterdiń ár kún maǵynaly ári kóńildi ótýde.
Gúlim AQAP,
Batys Qazaqstan oblysy
